Latest News

Latest News :

HSE PUBLIC EXAM - MARCH 2017 - STARTS ON 02.03.2017, SSLC PUBLIC EXAM - MARCH 2017 - STARTS ON 08.03.2017

Monday, November 9, 2015

ஆண்டு விழா 2015! சாதனை மாணவர்களுக்கு பரிசுகள் வழங்கப்பட்டன!!

காயல்பட்டினம் எல்.கே.மேனிலைப்பள்ளியின் ஆண்டு விழா 16.10.2015 வெள்ளிக்கிழமை 16.30 மணியளவில், பள்ளி வளாகத்தில் நடைபெற்றது. பள்ளி துணைத்தலைவர் எஸ்.எம்.உஸைர் உள்ளிட்ட நிர்வாகிகள், ஆட்சிக்குழு உறுப்பினர்கள் முன்னிலை வகித்தனர்.



பள்ளி ஆசிரியர்களான பீ.ஆனந்தக்கூத்தன், மவ்லவீ எச்.ஜுபைர் அலீ பாக்கவீ ஆகியோர் நிகழ்ச்சிகளை நெறிப்படுத்தினர். மாணவர் ஹாஃபிழ் என்.ஏ.முஹம்மத் ஸாலிஹ் நுஸ்கீ கிராஅத் ஓதி நிகழ்ச்சிகளைத் துவக்கி வைத்தார். தமிழ்த்தாய் வாழ்த்தைத் தொடர்ந்து, பள்ளி தாளாளர் டாக்டர் எஸ்.எல்.முஹம்மத் லெப்பை வரவேற்புரையாற்றினார்.

பணி நிறைவு பெறும் பள்ளியின் உடற்கல்வி ஆசிரியர் வேலாயுதம் உள்ளிட்ட அவையோருக்கு ஆண்டு விழாக் குழுவின் சார்பில் சால்வை அணிவித்து கண்ணியப்படுத்தப்பட்டது.





தலைமையாசிரியர் எம்.ஏ.எஃப்.செய்யித் அஹ்மத் - பள்ளியின் ஆண்டறிக்கையை வாசித்தார். கல்வி மற்றும் விளையாட்டுத் துறைகளில் பள்ளியின் சாதனைகளை விளக்கும் வகையில் அவ்வறிக்கை அமைந்திருந்தது.



இவ்விழாவிற்குத் தலைமை தாங்கிய பள்ளியின் தலைவர் டாக்டர் எம்.எஸ்.அஷ்ரஃப் தலைமையுரையாற்றினார்.



மத்திய கலால் துறை உதவி ஆணையர் ஏ.முத்தையா (IRS) இவ்விழாவில் சிறப்பு விருந்தினராகக் கலந்துகொண்டு வாழ்த்துரை வழங்கினார். அவருக்கு பள்ளி நிர்வாகத்தின் சார்பில் நினைவுப் பரிசு வழங்கி, சால்வை அணிவித்து கண்ணியப்படுத்தப்பட்டது.





தொடர்ந்து, 2014 - 2015 கல்வியாண்டில் பள்ளியின் அனைத்து வகுப்புகளிலும் கல்வித் தரத்தில் சிறப்பிடங்களைப் பெற்ற மாணவர்களுக்கு பரிசுகளும், சான்றிதழ்களும் வழங்கப்பட்டன. சிறப்பு விருந்தினர் மற்றும் பள்ளி நிர்வாகிகள் அவற்றை வழங்கினர்.





அத்துடன் மாலை அமர்வு நிறைவுற்றது. இரவு அமர்வு 19.00 மணியளவில் துவங்கியது. இவ்வமர்வில், பள்ளி மாணவர்கள் பங்கேற்ற பாடல், நாடகம், கலாச்சார நடனம், த, ப்ஸ் உள்ளிட்ட கலை நிகழ்ச்சிகள் நடைபெற்றன.









பள்ளியின் உதவி தலைமையாசிரியர் கே.எம்.ஐ.செய்யித் முகைதீன் நன்றி கூற, நாட்டுப்பண்ணுடன் விழா நிறைவுற்றது.

இவ்விழாவில் பள்ளியின் அனைத்து மாணவர்கள், ஆசிரியர்கள், நிர்வாகக் குழு உறுப்பினர்கள், மாணவர்களின் பெற்றோர் மற்றும் பொதுமக்கள் திரளாகக் கலந்துகொண்டனர்.

நன்றி : காயல்பட்டணம்.காம்

தடகளப் போட்டிகளுடன் நடைபெற்றது எல்.கே.மேனிலைப்பள்ளி விளையாட்டு விழா 2015!

காயல்பட்டினம் எல்.கே.மேனிலைப்பள்ளியின் விளையாட்டு விழா, 15.10.2015 வியாழக்கிழமையன்று பல்வேறு தடகளப் போட்டிகளுடன் நடைபெற்று முடிந்துள்ளது.

விழா நிகழ்ச்சிகளை பள்ளியின் அரபி மொழி ஆசிரியர் மவ்லவீ ஜுபைர் அலீ பாக்கவீ நிகழ்ச்சிகளை நெறிப்படுத்தினார். கிராஅத்தைத் தொடர்ந்து, தமிழ்த்தாய் வாழ்த்து பாடப்பட்டது. பின்னர் தலைமையாசிரியர் எம்.ஏ.எஃப்.செய்யித் அஹ்மத் வரவேற்புரையாற்றினார். ஆசிரியர் ஆனந்தக்கூத்தன் விழா அறிமுகவுரையாற்றினார்.

தொடர்ந்து நடைபெற்ற பரிசளிப்பு விழாவில் சிறப்பு விருந்தினராகக் கலந்துகொண்ட - கிருஸ்டியாநகரம் டீ.டி.டீ.ஏ. மேனிலைப்பள்ளியின் தலைமையாசிரியர் ஜேக்கப் மனோகர், விழா கொடியேற்றி வாழ்த்துரையாற்றினார்.





முன்னதாக அவருக்கு, பள்ளி நிர்வாகத்தின் சார்பில் துணைத்தலைவர் எஸ்.எம்.உஸைர் சால்வை அணிவித்து கண்ணியப்படுத்தினார். துணை தலைமையாசிரியர் கே.எம்.ஐ.செய்யித் முஹ்யித்தீன் நன்றி கூறினார்.











தொடர்ந்து மாணவர் அணிவகுப்பு நடைபெற்றது. மகாத்மா காந்தி நினைவு வளைவிலிருந்து துவங்கிய - மாணவர்களின் ஒலிம்பிக் ஜோதி ஓட்டம், மைதானத்தில் முடிவடைந்தது. கொடியேற்றத்தைத் தொடர்ந்து அனைவரும் ஒலிம்பிக் உறுதிமொழி எடுத்துக்கொண்டனர்.













மேடையில் அங்கம் வகித்தோர் சமாதானப் புறாக்களைப் பறக்க விட, விளையாட்டுப் போட்டிகள் துவங்கின.



வயது வரம்பிற்கேற்ப 100 மீட்டர், 1500 மீட்டர் ஓட்டப் பந்தயங்கள், வட்டு எறிதல், ஈட்டி எறிதல், உயரம் தாண்டுதல், நீளம் தாண்டுதல், லக்கி கார்னர், மிதிவண்டி மெது ஓட்டப்போட்டி, ஜிம்னாஸ்டிக் உள்ளிட்ட பல்வேறு தடகளப் போட்டிகள் நடைபெற்றன.































போட்டிகளில் வென்ற மாணவர்களுக்கு சிறப்பு விருந்தினரும், மேடையில் அங்கம் வகித்தோரும் பரிசுகளை வழங்கினர்.





பணி நிறைவு பெறும் பள்ளியின் உடற்கல்வி ஆசிரியர் வேலாயுதம் இப்பரிசளிப்பு விழாவின்போது பள்ளி நிர்வாகத்தால் கண்ணியப்படுத்தப்பட்டார். பள்ளியின் தாளாளர் டாக்டர் எஸ்.எல்.முஹம்மத் லெப்பையும், ஏற்கனவே பணி நிறைவு பெற்றும் - பள்ளியோடு இன்றளவும் தொடர்புடன் இருந்து சேவையாற்றி வரும் உடற்கல்வி ஆசிரியர் ஜெபராஜ் ராஜநாயகத்திற்கு, பள்ளியின் ஆட்சிக்குழு உறுப்பினர் எல்.கே.லெப்பைத்தம்பியும் சால்வை அணிவித்து கண்ணியப்படுத்தினர். நாட்டுப்பண்ணுடன் விழா நிறைவுற்றது.





ஏற்பாடுகளை, பள்ளி நிர்வாகம், தலைமையாசிரியர் வழிகாட்டுதலில் - ஆசிரியர்கள், அலுவலர்கள், முன்னாள் மாணவர்கள் உள்ளிட்டோர் செய்திருந்தனர்.

நன்றி : காயல்பட்டணம்.காம்

Sunday, October 18, 2015

மண்டல அளவிலான கால்பந்துப் போட்டியில் வென்று, மாநில அளவில் விளையாட எல்.கே.மேனிலைப்பள்ளி சீனியர் அணி தகுதி!

மண்டல அளவிலான கால்பந்துப் போட்டியில் வென்றதன் மூலம், மாநில அளவிலான போட்டியில் விளையாட, காயல்பட்டினம் எல்.கே.மேனிலைப்பள்ளி அணி தகுதி பெற்றுள்ளது. விரிவான விபரம் வருமாறு:-

பள்ளிகளுக்கிடையிலான கால்பந்து விளையாட்டுப் போட்டிகள், வட்டார - மாவட்ட - மண்டல - மாநில அளவில் ஆண்டுதோறும் நடத்தப்பட்டு வருகிறது.

வட்டார அளவிலும், பின்னர் மாவட்ட அளவிலும் நடைபெற்ற போட்டிகளில், காயல்பட்டினம் எல்.கே.மேனிலைப்பள்ளியின் 17 வயதுக்குட்பட்ட சீனியர் அணி, 19 வயதுக்குட்பட்ட சூப்பர் சீனியர் அணி ஆகியன வெற்றிபெற்று, மண்டல அளவில் விளையாடத் தகுதி பெற்றது. மண்டல அளவிலான போட்டி, 16.10.2015 வெள்ளிக்கிழமையன்று காலையில் நடைபெற்றது.

சீனியர் பிரிவு போட்டியில், டோனாவூர் சந்தோஷ் வித்யாலயா மேனிலைப்பள்ளியுடன் மோதிய எல்.கே.மேனிலைப்பள்ளி அணி, 2-0 என்ற கோல் கணக்கில் வெற்றிபெற்று, மாநில அளவிலான போட்டியில் விளையாடத் தகுதி பெற்றுள்ளது.



அன்று மாலையில் நடைபெற்ற சூப்பர் சீனியர் பிரிவிற்கான போட்டியில், டோனாவூர் சந்தோஷ் வித்யாலயா மேனிலைப்பள்ளியுடன் மோதிய எல்.கே.மேனிலைப்பள்ளி அணி, 1-0 என்ற கோல் கணக்கில் வெற்றிவாய்ப்பை இழந்தது.

நன்றி : காயல்பட்டணம்.காம்

Saturday, October 3, 2015

தமிழக அரசின் மடிக்கணினி வினியோகம்!

காயல்பட்டினம் எல்.கே.மேனிலைப்பள்ளியில், கடந்த 2014-15 கல்வியாண்டில் 12ஆம் வகுப்பு பயின்று முடித்த 85 மாணவர்களுக்கு, தமிழக அரசின் விலையில்லா மடிக்கணினி வழங்கும் நிகழ்ச்சி 26.09.2015 சனிக்கிழமையன்று, பள்ளி வளாகத்தில் நடைபெற்றது.

பள்ளி தலைமையாசிரியர் எம்.ஏ.எஃப்.செய்யித் அஹ்மத் நிகழ்ச்சிக்குத் தலைமை தாங்கி, அனைவரையும் வரவேற்றுப் பேசினார்.


சிறப்பு விருந்தினராகக் கலந்துகொண்ட - காயல்பட்டினம் நகர்மன்றத் தலைவர் ஐ.ஆபிதா ஷேக், வாழ்த்துரையாற்றியதோடு, மாணவர்களுக்கு மடிக்கணினிகளை வழங்கி, வினியோகத்தைத் துவக்கி வைத்தார்.






பள்ளியின் ஆட்சிக்குழு உறுப்பினர் எல்.கே.லெப்பைத்தம்பி, பள்ளிப் பகுதியை உள்ளடக்கிய 13ஆவது வார்டு நகர்மன்ற உறுப்பினர் எம்.எஸ்.எம்.ஷம்சுத்தீன் மற்றும் ஆசிரியர்கள் தொடர்ந்து மாணவர்களுக்கு மடிக்கணினிகளை வழங்கினர்.





இந்நிகழ்ச்சியின்போது, மொத்தமுள்ள 105 மாணவர்களுள் முதற்கட்டமாக 085 மாணவர்களுக்கு மடிக்கணினிகள் வழங்கப்பட்டுள்ளமை குறிப்பிடத்தக்கது.

நன்றி : காயல்பட்டணம்.காம்