Latest News

Latest News :

HSE PUBLIC EXAM - MARCH 2017 - STARTS ON 02.03.2017, SSLC PUBLIC EXAM - MARCH 2017 - STARTS ON 08.03.2017

Tuesday, December 20, 2016

“நடப்பது என்ன?” சமூக ஊடகக் குழும ஒருங்கிணைப்பில், எல்.கே.மேனிலைப்பள்ளியின் NCC மாணவர்கள் தூய்மை விழிப்புணர்வு முகாம்!

காயல்பட்டினம் கடற்கரைக்கு வரும் பொதுமக்கள், அங்கு தின்பண்டங்களை உட்கொண்ட பின், அவற்றின் கழிவுகளையும், காகிதக் கோப்பை உள்ளிட்ட கழிவுப் பொருட்களையும் இருந்த இடத்திலேயே போட்டுவிட்டு, மணற்பரப்பை அசுத்தப்படுத்திச் செல்வது வாடிக்கை.

இக்குறையைப் போக்கி, பொதுமக்களுக்கு தூய்மை விழிப்புணர்வை ஏற்படுத்தும் நோக்குடன், “நடப்பது என்ன?” சமூக ஊடகக் குழுமம் சார்பில், காயல்பட்டினம் நகராட்சியுடன் இணைந்து கடற்கரையில் “தூய்மை விழிப்புணர்வு முகாம்” நடத்துவதென அதன் நிர்வாகக் குழுவால் திட்டமிடப்பட்டு, கடற்கரையில் மக்கள் திரள் எதிர்பார்க்கப்படும் நாட்களில் முகாம்களும் நடத்தப்பட்டு வருகிறது.

அந்த வரிசையில், 17.12.2016. சனிக்கிழமையன்றும், நேற்றும் (18.12.2016. ஞாயிற்றுக்கிழமை) கடற்கரையில் தூய்மை விழிப்புணர்வு முகாம் நடத்தப்பட்டது. முதல் நாள் முகாமில் “நடப்பது என்ன?” சமூக ஊடகக் குழுமத்தின் ஆலோசகர்கள், அங்கத்தினர், நிர்வாகிகள் கலந்துகொண்டனர்.

நேற்று, “நடப்பது என்ன?” சமூக ஊடகக் குழும ஒருங்கிணைப்பில், காயல்பட்டினம் எல்.கே.மேனிலைப்பள்ளியின் தேசிய மாணவர் படைப் பிரிவின் தூய்மை விழிப்புணர்வு முகாம் கடற்கரையில் நடைபெற்றது.

துவக்கமாக, குழுமத்தினருடன் மாணவர்கள் தங்களை அறிமுகம் செய்துகொள்ள, கடற்கரையில் மேற்கொள்ளப்பட வேண்டிய தூய்மை விழிப்புணர்வு செயல்பாடுகள் குறித்து, தேசிய மாணவர் படை பயிற்றுனர் ‘ஆசிரியர்’ காமில், “நடப்பது என்ன?” சமூக ஊடகக் குழும நிர்வாகி எஸ்.கே.ஸாலிஹ் ஆகியோர் - தேசிய மாணவர் படை வீரர்களுக்கு அறிவுரை வழங்கினர். தொடர்ந்து, வீரர்கள் அடையாள அணிவகுப்பு நடத்தி, முகாம் நடவடிக்கைகளைத் துவக்கினர்.







வீரர்களுள் ஒரு பிரிவினர், இருசக்கர - நாற்சக்கர வாகனங்களில் வந்தோரிடம் வாகனங்களை ஓரமாகவும், வரிசையாகவும் நிறுத்துமாறும், நுழைவாயிலை மறைத்து நிறுத்த வேண்டாம் எனவும் கேட்டுக்கொண்டதற்கிணங்க, அவர்கள் அதற்கு ஒத்துழைப்பளித்தனர்.



ஒருபுறம் ஒலிபெருக்கி வழியே தூய்மை விழிப்புணர்வு அறிவுரைகள் பொதுமக்களுக்கு ஒலிபரப்பாகிக் கொண்டிருக்க, மறுபுறத்தில் தேசிய மாணவர் படையினர் - கடற்கரைக்கு வந்த பொதுமக்களுக்கு காகித உறைகளை வழங்கி, குப்பைகளை அவற்றில் சேகரித்து வைத்துக்கொண்டு, வீடு திரும்புகையில் கடற்கரை நுழைவாயிலில் காயல்பட்டினம் நகராட்சியால் வைக்கப்பட்டுள்ள குப்பைத் தொட்டியில் அவற்றைப் போட்டுச் செல்லுமாறும், இனி வருங்காலங்களில் குப்பைகளுக்கென ஒரு காகிதப் பையைக் கொண்டு வருவதை வழமையாக்கிக் கொள்ளுமாறும் கேட்டுக்கொண்டனர்.







இதனால் மனமகிழ்ந்த சமூக ஆர்வலர்கள் பலர் தேசிய மாணவர் படையின் இளம் மாணவர்களை மனதார வாழ்த்தியதுடன், முழு ஒத்துழைப்பு வழங்குவதாகக் கூறிச் சென்றனர்.









கடற்கரையின் உள்ளே ஆங்காங்கே அமர்ந்திருந்த பொதுமக்களிடையே - குறு ஒலிபெருக்கி மூலம் தேசிய மாணவர் படை வீரர்கள் விழிப்புணர்வு பரப்புரைகளைச் செய்தனர்.



19:30 மணியளவில் முகாமை நிறைவுபடுத்தும் வகையில், சிறப்பு அமர்வு நடைபெற்றது. “நடப்பது என்ன?” சமூக ஊடகக் குழும நிர்வாகி எம்.டபிள்யு.ஹாமித் ரிஃபாய் நிறைவுரையாற்றினார்.



முகாமில் சிறப்புற பங்காற்றியமைக்காக எல்.கே.மேனிலைப்பள்ளியின் தேசிய மாணவர் படையினருக்கும், அதற்கு அனுமதியளித்த - பள்ளியின் நிர்வாகிகள் - தலைமையாசிரியருக்கும், அழைத்து வந்து முழு ஒத்துழைப்பளித்த பயிற்றுநருக்கும், நன்றி கூறி தனதுரையைத் துவக்கி அவர், கடற்கரையில் பொதுமக்களுக்கு உள்ள உரிமைகளையும், கடமைகளையும், எதிர்பார்க்கப்படும் ஒத்துழைப்புகளையும் விளக்கிப் பேசியதுடன், இது தொடர்பாக “நடப்பது என்ன?” சமூக ஊடகக் குழுமம் மேற்கொண்டு வரும் நடவடிக்கைகள், நகர்நலன் காக்க குழுமத்தால் மேற்கொள்ளப்பட்டு வரும் இதர செயல்திட்டங்கள் குறித்தும் விளக்கினார்.



இனி வருங்காலங்களில் கடற்கரையில் மக்கள் திரள் எதிர்பார்க்கப்படும் பண்டிகை நாட்கள், தேவைப்படும்போது வார விடுமுறை நாட்களில் - குழுமத்தின் தூய்மை விழிப்புணர்வு முகாம்கள் தொடர்ந்து நடத்தப்படும் என அவர் குழுமத்தின் சார்பில் அறிவித்தார்.





தம் வேண்டுகோளை மதித்து, தமது குப்பைகளைப் பொறுப்புடன் காகிதப் பைகளில் இட்டு, குப்பைத் தொட்டியில் போட்டுச் சென்றமைக்காக, “நடப்பது என்ன?” சமூக ஊடகக் குழுமத்தினர் பொதுமக்களுக்கு நன்றி தெரிவித்தனர். கடற்கரை துப்புரவுப் பணிக்கு ஒத்துழைப்பு கோரி - அங்கிருந்த தின்பண்ட வணிகர்களிடமும் குழுவினர் வேண்டுகோள் வைத்து அவர் உரையை நிறைவு செய்தார். நிறைவில், அனைவருக்கும் சிற்றுண்டி வழங்கி உபசரிக்கப்பட்டது.



முகாம் ஏற்பாடுகளை, “நடப்பது என்ன?” சமூக ஊடகக் குழுமத்தின் ஆலோசகர்களும், அங்கத்தினருமான - எஸ்.ஏ.முகைதீன், எஸ்.அப்துல் வாஹித், பீ.எம்.ஏ.ஸதக்கத்துல்லாஹ், எம்.ஏ.புகாரீ, ‘மெகா’ நூஹ், ஏ.எஸ்.புகாரீ, ‘தமிழன்’ முத்து இஸ்மாஈல், ஹாஃபிழ் எஃப்.ஷெய்க் ஸலாஹுத்தீன், ‘நெட்காம்’ புகாரீ, எஸ்.ஏ.முஹம்மத் நூஹ், சாளை நவாஸ், எம்.எஸ்.முஹம்மத் ஸாலிஹ், அப்துல் அஜீஸ், எம்.எம்.முஜாஹித் அலீ, எம்.என்.அஹ்மத் ஸாஹிப் உள்ளிட்டோர் செய்திருந்தனர்.
Thanks : Kayalpatnam.com



No comments:

Post a Comment